近年香港嘅生活質素每況愈下，物價越嚟越貴，交通又越嚟越迫，移民台灣，似乎係越來越多人討論嘅未來岀路。不過原來除咗香港人之外，作為好多香港人第二個鄉下嘅日本，原來近年都出現咗呢一個討論，最近日本有個電視節目就以移民台灣作為專題，進行咗一系列嘅訪問。調查中發現，原來近年單係移居台北市嘅日本人就已經超過2萬人，可能大家都會好奇，點解咁多香港人鍾意嘅日本，竟然都會掀起移民台灣嘅熱潮？喺節目入面就分析咗以下幾個主要嘅原因。

 

1.物價低

 

台灣嘅物價同香港比較之下算係偏低，同日本比較之下更加係小巫見大巫，好似以三餐都外岀消費計算，係台灣只需要約270台幣就足夠，約$70港幣，如果係日本嘅話，只係兩餐就已經要大概600-800台幣（$150-200港幣），對於日本人來講係台灣消費相對化算好多。

 

2.不排外又熱情

 

台灣人係眾多亞洲地區來講相對比較熱情，而且對於外來文化嘅接受程度比較高，唔會好似喺日本咁有排外嘅情況出現，相比日本都市嘅冷漠感令外來人難以接近，係台灣就算以外國人身份生活同居住都唔難融入當地。

 

3.離日本近

 

台灣同日本係地理位置上嘅接近，就算日本人移居台灣都可以隨時返家鄉探望親人朋友，而且兩地時差只有一小時，要維繫同家人朋友溝通都比較容易。

 

4.日本人有優勢

 

台灣好多公司都需要招聘熟悉日本文化同日語嘅員工，應付對日嘅聯絡同業務工作，學歷反而係其次，而且就算唔做全職，教授日語嘅工作係台灣都可以有一定嘅收入，係搵工方面負擔比較輕。